अखिल नेपाल फुटबल संघ (एन्फा) को साधारण सभामा शुक्रवार धुलिखेलमा विवाद उत्पन्न भएको छ जब पूर्वअध्यक्ष गणेश थापालाई प्रवेशमा रोक लगाइयो। सुरक्षाकर्मीहरूले थापालाई गेटमै रोकेपछि केही समय वातावरण तनावपूर्ण बनेको थियो, यद्यपि भित्र साधारणसभा भने निरन्तर सञ्चालन भइरहेको थियो।
साधारण सभाको उद्घाटन राष्ट्रिय खेलकुद परिषद्का अध्यक्ष टंकलाल घिसिङले गरेका थिए। एन्फाका अधिकारीहरूले थापासँग आवश्यक प्रवेश पास नभएको कारण प्रवेश निषेध गरिएको जनाएका छन्।
घटनालाई मध्यनजर राख्दै उल्लेख्य संख्यामा सुरक्षाकर्मीहरू घटनास्थलमा परिचालित गरिएको थियो। थापाले आफू उच्च अदालत पाटनको आदेशअनुसार सभामा सहभागी हुन आएको बताए। उनले एन्फालाई अदालतको आदेश नमान्ने भए स्पष्ट जवाफ दिन वा साधारण सभामा प्रवेश गर्न अनुमति दिन आग्रह गरे।
थापाले भने, “कि अदालतको निर्णय मान्दिन भन्नुपर्यो, कि साधारणसभामा प्रवेश दिनुपर्यो, नत्र रोकेर राख्न मिल्छ? हिजो अन्तरिम आदेश दियो, मलाई र गौरव थापालाई साधारण सभामा नरोक्नु भनेर। एन्फाको तर्फबाट मेरो खारेजी गर्न अध्यक्षजी स्वयं आउनुभयो। बहस भयो तर खारेजी भएन तर अहिले उहाँहरु छिर्न दिनुहुन्न मलाई।”
सम्भावित अवरोधको आशंकामा थापाले उच्च अदालत पाटनमा रिट दायर गरेका थिए। वैशाख २१ मा न्यायाधीश सुदर्शनदेव भट्टको इजलासले थापाको पक्षमा अन्तरिम आदेश जारी गरेको थियो, जसपछि उनी साधारणसभामा उपस्थित हुन पुगेका हुन्।
तथापि, एन्फाका प्रवक्ता सुरेश साहले अदालतको आदेशबारे औपचारिक जानकारी प्राप्त नभएको जिकिर गरे। उनले भने, “अफिसियल्ली हिसावले निर्णय भन्नुभएको छ। त्यो सचिवालयलाई थाहा होला, हामीलाई थाहा छैन। हामीले बुझ्नुपर्ने कुरा के हो भने, एन्फामा अहिले २५-३० वटा मुद्दा छन्। कुन आदेश सचिवालयमा आयो/आएन भन्ने जानकारी सचिवालयबाट आउनुपर्छ।”
फिफाले भ्रष्टाचार र आचारसंहिता उल्लंघनको आरोपमा सन् २०१५ अप्रिल १६ मा थापालाई १० वर्षका लागि निलम्बन गरेको थियो। यो निलम्बन सन् २०२५ अप्रिल १५ मा समाप्त भएपछि थापा पुनः फुटबल गतिविधिमा सक्रिय हुन थालेका छन्।
नेपाल फुटबल संघको साधारण सभामा पूर्व अध्यक्षको प्रवेशमाथि विवाद
