काठमाडौँ, वैशाख २३ – राष्ट्रपति रामचन्द्र पौडेलले नेपाली चिकित्सकहरू विदेशिने क्रम बढ्दै जानु देशका लागि चिन्ताको विषय भएको बताएका छन्।
मंगलबार काठमाडौँमा आयोजित चिकित्सा विज्ञान राष्ट्रिय प्रतिष्ठानको २३ औँ स्थापना दिवसको कार्यक्रममा बोल्दै राष्ट्रपति पौडेलले यस्तो धारणा व्यक्त गरेका हुन्।
“नेपालमै स्तरीय स्वास्थ्य सेवा तथा उपचार हुन थालेको छ भन्ने मैले आफैँ अनुभव गरेको छु,” राष्ट्रपति पौडेलले भने। “तर स्वास्थ्य सेवामा सुधार हुँदाहुँदै पनि सम्पूर्ण जनशक्तिले पर्याप्त अवसर नपाएको भन्ने गुनासो आइरहेको छ।”
उनले यही कारणले गर्दा योग्य चिकित्सकहरू विदेशिने क्रम बढिरहेको र यो देशका लागि गम्भीर चुनौती बन्दै गएको बताए।
कार्यक्रममा स्वास्थ्य मन्त्रालयका अधिकारीहरू, चिकित्सा शिक्षाविद् तथा विभिन्न अस्पतालका प्रतिनिधिहरूको उपस्थिति थियो।
राष्ट्रपति पौडेलले चिकित्सकहरूलाई देशमै बस्न प्रोत्साहन गर्ने खालका नीतिगत व्यवस्था गर्नुपर्नेमा जोड दिए। साथै, उनले स्वास्थ्य सेवालाई थप सुदृढ बनाउन सरकारले आवश्यक कदम चाल्नुपर्ने बताए।
स्थापना दिवसको अवसरमा प्रतिष्ठानले विभिन्न क्षेत्रमा उत्कृष्ट योगदान पुर्याउने चिकित्सक तथा स्वास्थ्यकर्मीहरूलाई सम्मान पनि गरेको थियो।
