राम्रो दृष्टि कोरोना संक्रमण (कोभिड–१९) को दोस्रो लहरले, वराहक्षेत्र नगरपालिकामा कर्मचारीसहित एक दर्जन सङ्क्रमित भएका छन् ।
कोरोना पोजेटिभ हुनेमा कर्मचारी पुरुष १ जना रहेका छन् । सङ्क्रमित अन्यमा वडा नं. २, ५, ६, ७, ९ र १० का स्थानीय रहेको स्वास्थ्य अधिृकत उमेश मेहताले बताए । कर्मचारीको सङ्क्रमण रिपोर्ट हिजो आएको थियो भने अन्यले अस्पतालमा आफैं आएर चेकजाँच गराएको अधिकृत मेहताले बताए ।
सङ्क्रमित हुनेमा ३० देखि ८० वर्ष उमेरका महिला तथा पुरुष रहेका छन् । महिलाको दाँजोमा पुरुष बढी सङ्क्रमित रहेको तथ्याङ्कमा देखिएको छ । उनीहरू सबै होम आइसोलेशनमा रहेको स्वास्थ्य अधिकृत मेहताले जानकारी दिए ।
कोरोना व्यवस्थापनका लागि वराहक्षेत्र र रामधुनी नगरपालिकाले तीन स्थानलाई प्रस्ताव गरेको छ । वराहक्षेत्रको वडा नं. १ स्थित रामानन्दाचार्य सेवा पीठमा १५०, मधुवनस्थित माझी सङ्ग्रहालयमा २५ देखि ३० र रामधुनी नगरपालिकाको झुम्कास्थित कृषि तालिम केन्द्रमा ५० शैयाको आइसोलेशन सेन्टर बनाउन प्रस्ताव गरिएकोे वराहक्षेत्रका प्रमुख प्रशासकीय अधिकृत राजेशप्रसाद पोखरेलले बताए ।
चतरास्थित रामानन्दाचार्य सेवा पीठलाई प्रदेश १ सरकारले पहिला पनि आइसोलेशन र होल्डिङ सेन्टरको रुपमा प्रयोगमा ल्याएको थियो ।
निषेधाज्ञा पालनमा लापरबाही
हाल फैलिएको नयाँ भेरियन्टसहितको कोरोनाको दोस्रो लहरले विश्व आक्रान्त भइरहेको छ । सुनसरी जिल्ला प्रशासनले लागू गरेको निषेधाज्ञाको पालनामा कमजोरी देखिएको स्थानीयले गुनासो गरेका छन् ।
विवाहमा १५ जना जन्ती र प्रिती भोजमा २५ जनासम्म जान पाइने भनिए पनि त्यसको अवज्ञा गरिएको पाइएको छ । राति अबेरसम्म भीड गरिएको स्थानीयले गुनासो गरेका छन् । निषेधाज्ञाको पालनामा लापरबाही देखिएको सर्वसाधारणको गुनासो बढेको छ ।
अवज्ञा गर्नेको सवारी नियन्त्रणमा
इलाका प्रहरी कार्यालय चक्रघट्टीले निषेधाज्ञाको उल्लङ्घन गर्ने ६५ वटा सवारी नियन्त्रणमा लिएको छ । दुई, तीन र चार चक्के सवारीका साधनलाई नियन्त्रणमा लिएको इप्रका चक्रघट्टीले जनाएको छ ।कारबाही पर्नेमा ४ पाङ्ग्रे ३ वटा, तीन पाङ्ग्रे १२ वटा, र २ पाङ्ग्रे ५० वटा सवारी रहेको इप्रका चक्रघट्टीका प्रहरी निरीक्षक पाण्डव राजवंशीले बताए । अवज्ञा गर्नेलाई सम्झाई–बुझाई गरी छाडिएको र आइन्दा निषेधाज्ञा उल्लंघन नगर्न चेतावनी दिएको प्रहरी निरीक्षक राजवंशीले बताए ।
इलाका प्रहरी कार्यालय चतराले भने निषेधाज्ञाको अवज्ञा गर्ने २५ वटा मोटर साइकललाई नियन्त्रणमा लिई कारबाही गरेको छ । चतरास्थित कोशी पूल र वडा नं. १ र २ मा २५ मोटरसाइकललाई नियन्त्रणमा लिइएको सई अमरकुमार लावतीले जानकारी दिए ।
ब्लाष्ट दैनिक स्रोत
