नेपाली मिडियामा प्रयोग हुने भाषा शैलीबारे असन्तुष्टि जनाएका प्रधानमन्त्री केपी शर्मा ओलीले समाचारमा प्रयोग हुने केही अभिव्यक्तिहरूमा आपत्ति जनाएका छन्। गोरखापत्र दैनिकको १२५औँ स्थापना दिवस र ६३औँ वार्षिकोत्सवको अवसरमा उनले नेपालीमा अनौपचारिक रूपमा प्रयोग हुने “तिमी” सम्बोधनलाई उचित नभने बताए।
राजतन्त्रकालीन समयको सम्झना गर्दै ओलीले त्यतिखेरका पत्रपत्रिकाहरूले प्रयोग गर्ने भाषा शैलीको उदाहरण दिए। “राजा हुँदा पत्रपत्रिकाहरूमा लेखिन्थ्यो, ‘राजाले हेर्दैनन्, अवलोकन गर्छन्। हिँड्दैनन्, भ्रमण गर्छन्। बस्दैनन्, विश्राम गर्छन्। सुत्दैनन्, शयन गर्छन्।’ अहिले राजतन्त्र गएपछि जनताका छोराछोरीलाई सम्मान गर्नु हुँदैन र?” उनले भने।
उनले राष्ट्रपतिलाई समाचारमा कसरी सम्बोधन गरिएको छ भन्ने विषयमा पनि आपत्ति जनाए। “राष्ट्रपतिले के भने नभने मलाई सम्झना छैन, तर ‘नातिलाई कुरा गरेपछि राष्ट्रपतिले उद्घाटन गर्नुभयो’ भन्ने भाषा उचित नेपाली भाषा होइन,” उनले उच्चपदस्थ व्यक्तिहरूको समाचारमा प्रयोग हुने अनौपचारिक भाषालाई आलोचना गर्दै भने।
ओलीले नेपाली भाषाको गरिमा अनुचित अभिव्यक्तिबाट ह्रास हुन नदिन आग्रह गरे। “तिमी भनेपछि बाजे पनि हुन्छ, नाति पनि हुन्छ। केही भाषाहरूमा अभिव्यक्ति सीमित भएको भन्दैमा हामी आफ्नै भाषालाई तल झार्ने हो?” उनले दृढतापूर्वक भने।
उनले गोरखापत्रलाई नेपाली पत्रकारितामा भाषिक शुद्धताको मानक भएको बताए। उनका अनुसार, “गोरखापत्र नेपाली भाषाको शुद्धताको प्रतिमान मानिन्छ। यसले भाषिक आन्दोलनहरू संरक्षण गर्ने क्षेत्रमा अग्रणी भूमिका खेलेको छ।”
प्रधानमन्त्री ओलीले नेपाली मिडियामा बढ्दो नकारात्मक टिप्पणी र कृत्रिम बौद्धिकताको प्रवृत्तिको पनि आलोचना गरे। “जे भए पनि नकारात्मक आलोचना गर्ने, कृत्रिम बौद्धिकता प्रदर्शन गरी चरित्र हत्या गर्ने, आज झूटलाई सत्य बनाएर प्रचार गर्ने र भोली यसलाई न्यायोचित ठहराउनेहरू छन्। गोरखापत्रले यस्तो प्रवृत्तिको विरोध गर्नुपर्छ,” उनले जोड दिए।
