उच्च अदालत विराटनगरले बराहक्षेत्र नगरपालिकाको घरटहरा हटाउने सम्बन्धी सूचनामा अल्पकालीन अन्तरिम आदेश जारी गरेको छ ।
पीडित रतनलाल चौधरीसमेत १५ जनाको रिट निवेदनमाथि उच्च अदालत विराटनगरले विपक्षी/ प्रत्यर्थी विरुद्ध आदेश जारी गरेको हो । बराहक्षेत्र नगरपालिकासहित नगरप्रमुख रमेश कार्की, उपप्रमुख नन्दकुमारी सुनुवार र बराहक्षेत्र-५ का वडाध्यक्ष रोहित काफ्लेका नाउँमा निषेधाज्ञायुक्त परमादेश जारी भएको छ ।
बराहक्षेत्र-५ स्थित खुनटोलदेखि कालाबन्जर हैंटा खोला अगाडिको खाली ठाउँमा बसोबास गर्दै आएका निवेदकले सुकुम्बासी समस्या आयोग सुनसरी जिल्लाबाट जग्गाधनी दर्ता प्रमाण पुर्जा प्राप्त गरेको र सोही स्थानमा लामो समयदेखि बसोबास गरी घर धुरी कर तिरेको रसिद समेत निवेदन साथ पेश गरेको देखिंदा विपक्षी बराहक्षेत्र नगरपालिकाको कार्यालयबाट घरटहरा हटाउने सम्बन्धी गत माघ ७ गते जारी गरेको १५ दिने सूचना उक्त छलफल मितिसम्मको लागि यथास्थितिमा राखी कार्यान्वयन नगर्नू नगराउनू भनी विपक्षीहरुको नाउँमा अल्पकालीन अन्तरिम आदेश जारी भएको उल्लेख छ ।
उच्च अदालतले आदेशानुसार निवेदन र आदेशको प्रतिलिपिसमेत पन्ध्र दिने म्याद जारी गरी विपक्षीको नाउँमा पठाएको छ। म्याद प्राप्त गरेको मितिले बाटाका म्यादबाहेक १५ दिनभित्र आफै वा कानून बमोजिमको प्रतिनिधिमार्फत लिखित जवाफ पेस गर्न आदेश गरेको छ । म्यादभित्र लिखित जवाफ पेस नगरी म्याद गुजारी बसे कानुनबमोजिम हुने आदेशमा उल्लेख छ ।
बर्सौंदेखि स्थानीयले बसोबास गर्दै आएको र भोगचलन गर्दै आएको उक्त क्षेत्रमा बराहक्षेत्र नगरपालिकाले कुनै दीर्घकालीन योजना र पीडितहरूलाई विकल्पबिनै उठीबास लगाउन खोजेको भन्दै स्थानीयले विरोध गर्दै आएका थिए ।
