रक्सी खानु हुँदैन, ब्राण्डिङ गर्नुपर्छ: देउवा

नेपाली कांग्रेसका सभापति शेरबहादुर देउवाले थारु समुदायको आर्थिक समृद्धिका लागि स्थानीय उत्पादनको ब्राण्डिङ गर्नुपर्ने बताएका छन्।

उनले मदिराको ब्राण्डिङ गरेर आम्दानी लिन सकिने भन्दै थारु समुदायको आर्थिक स्तर वृद्धि अपरिहार्य रहेको उल्लेख गरे।

दाङको दङ्गिशरण गाउँपालिका–३, चखौरामा आयोजित अन्तरप्रदेशीय थारु सांस्कृतिक सम्मेलनलाई सम्बोधन गर्दै देउवाले कमैया प्रथा उन्मूलनपछि थारु समुदायमा ठूलो परिवर्तन आए पनि आर्थिक रूपमा अझै सबल बन्न नसकेको बताए।

‘कमैया प्रथाको अन्त्य मेरो नेतृत्वको सरकारले गर्‍यो। त्यसपछि थारु समुदायले हकअधिकार पाए, जीवनशैलीमा परिवर्तन आयो। तर, आर्थिक रूपमा जति सक्षम हुनुपर्ने हो, त्यति हुन सकेको छैन,’ देउवाले भने, ‘अब थारु समुदायलाई आर्थिक समृद्धिसँग जोड्न जरुरी छ।’

उनले थारु समुदायको कला, संस्कृति र खानाका परिकारलाई व्यवसायीकरण गर्न सकिने उल्लेख गर्दै त्यसबाट समुदायले प्रत्यक्ष लाभ लिन सक्ने बताए।

‘लोकल मदिराको ब्राण्डिङ गरेर बिक्री गर्न सकियो भने थारु समुदायले आम्दानी बढाउन सक्छ। कानुनी जटिलता भए हटाउन सरकारसँग म कुरा गर्छु,’ देउवाले भने, ‘यस्तै, थारु परिकार र नृत्यलाई पनि व्यवसायीकरण गर्नुपर्छ।’

उनले स्थानीय उत्पादनको प्रवर्द्धन भएमा विदेशी मदिराको आयात घट्ने र नेपालकै आर्थिक स्तर वृद्धि हुने बताए।

‘रक्सी खानु हुँदैन, स्वास्थ्यलाई असर गर्छ,’ देउवाले भने, ‘तर यसको बिक्री गरेर समुदायले आम्दानी गर्न सक्छ। त्यसका लागि वातावरण बनाउन म सरकारसँग पहल गर्छु।’

त्यस्तै, देउवाले संघीय, प्रदेश र स्थानीय सरकारहरू थारु समुदायको समृद्धिका लागि गम्भीर भएर लाग्नुपर्ने बताए।