बराहक्षेत्र-७ स्थित वसन्त ऋतु माविको खेलमैदानमा जारी तेस्रो बराहक्षेत्र मेयर लिग कप फुटबल प्रतियोगिताअन्तर्गत समूह चरणको तेस्रो दिनको चौथो र पाँचौ खेलमा बराहक्षेत्र-८ र १ विजयी भएका छन् ।
आज मङ्गलबार भएको पहिलो खेलमा बराहक्षेत्र-७ विरुद्ध १-० गोल अन्तरले बराहक्षेत्र-८ विजयी भएको छ । जितका लागि म्यान अफ द म्याच सगेन राईले निर्णायक गोल गरेका थिए । उनलाई इलाका प्रहरी कार्यालयका प्रहरी निरीक्षक विकास राईले नगद २ हजार १ सय रुपैयाँसहित ट्रफी हस्तान्तरण गरे ।
आजै भएको पाँचौ खेलमा बराहक्षेत्र-६ लाई २-१ गोल अन्तरले पराजित गर्दै बराहक्षेत्र-१ ले दुई खेलमा पहिलो जित दर्ता गरेको छ ।
जितका लागि म्यान अफ द म्याच अमिन श्रेष्ठले २ गोल गरेका थिए । उनलाई बराहक्षेत्र-१ का वडाध्यक्ष किसन थापाले नगद २ हजार १ सयसहित ट्रफी हस्तान्तरण गरे ।
आइतबार वडा नम्बर ५ सँग २-० गोल अन्तरले पराजय बेहोरेको १ नम्बर वडाले दोस्रो खेलमा वडा नम्बर ६ विरुद्ध पहिलो जित निकालेको हो । वडा नम्बर ६ ले आफ्नो दोस्रो खेल वडा नम्बर ५ विरुद्ध आगामी फागुन १६ गते र तेस्रो खेल आगामी १८ गते वडा नम्बर १० विरुद्ध खेल्ने छ । वडा नम्बर १ ले भने समूहचरणको अन्तिम खेल वडा नम्बर १० विरुद्ध आगामी फागुन १६ गते खेल्नेछ ।
भोलि बुधबार हुने पहिलो खेलमा वडा नम्बर ५ र १० भिड्ने छन् भने दोस्रो खेल वडा नम्बर ११ र वडा नम्बर ४ बीच हुने आयोजकले जानकारी दिएको छ ।
