सप्तरी । सप्तरीको सप्तकोशी नगरपालिका–५, गंगाजली (भत्तेपुर) मा शनिबारदेखि दुईदिने आदिवासी जनजाति साहित्य महोत्सव–२०८३ सुरु भएको छ।
सप्तकोशी नगरपालिका–५ नम्बर वडा कार्यालयको आयोजनामा कात्तिक १४ र १५ गते सञ्चालन हुने महोत्सवको उद्घाटन मधेश प्रदेशका प्रदेश प्रमुख सुरेन्द्र लाभले आदिवासी जनजातिका परम्परागत बाजागाजा बजाएर गर्नुभएको हो।
वडाध्यक्ष तथा आयोजक समितिका अध्यक्ष गोसाई चौधरीको सभाध्यक्षतामा सम्पन्न उद्घाटन समारोहमा सप्तकोशी नगरपालिकाका नगरप्रमुख कृष्णप्रसाद ढकाल विशेष अतिथिका रूपमा सहभागी हुनुहुन्थ्यो।
त्यसैगरी माननीय रामबहादुर थापा मगर, सुवोध सिंह, पासाङ शेर्पा, राजकुमार लेखी, रामआशिष यादव, तुलसी चौधरी र राजेन्द्रप्रसाद चौधरीलगायतको विशेष आतिथ्यता रहेको थियो।
कार्यक्रममा तुलसी चौधरी, रामलाल चौधरी, अञ्जुबाजी शर्मा, पारस डोटेल झा, फोनिज संघीय अध्यक्ष लक्की चौधरी, छुट्टनप्रसाद कुशवाहालगायत विभिन्न क्षेत्रका व्यक्तित्व तथा आदिवासी जनजातिका जातीय संघसंस्थाका प्रतिनिधिहरूको उल्लेख्य उपस्थिति रहेको थियो।
महोत्सवमा विभिन्न जातजातिका परम्परागत झाँकी, सांस्कृतिक नृत्य, बाजागाजा तथा जातीय पहिचान झल्काउने सांस्कृतिक प्रस्तुतिहरू प्रदर्शन गरिएको थियो। विभिन्न समुदायका भाषा, साहित्य, कला, संस्कृति र पहिचानको संरक्षण तथा प्रवर्द्धन गर्ने उद्देश्यले महोत्सव आयोजना गरिएको हो।
कार्यक्रममा बोल्दै नेपाल आदिवासी जनजाति पत्रकार महासंघ (फोनिज) का संघीय अध्यक्ष लक्की चौधरीले पुर्खाहरूले जोगाउँदै ल्याएको भाषा, संस्कृति, परम्परा र पहिचानलाई वर्तमान पुस्ताले निरन्तरता दिन नसकेकोप्रति चिन्ता व्यक्त गर्नुभयो।
उहाँले अहिलेको पुस्ता शिक्षित हुँदै गए पनि राजनीति, सरकारी निकाय तथा विभिन्न संघसंस्थामा आदिवासी जनजातिको उल्लेखनीय पहुँच र प्रतिनिधित्व स्थापित हुन नसकेको बताउनुभयो। शिक्षा हासिल गर्नुका साथै राज्यका विभिन्न तहमा आफ्नो उपस्थिति र पहुँच विस्तार गर्नुपर्नेमा उहाँले जोड दिनुभयो।
दुई दिनसम्म सञ्चालन हुने महोत्सवमा आदिवासी जनजातिका भाषा, साहित्य, कला, संस्कृति, परम्परा र पहिचानका विषयमा छलफल तथा विविध सांस्कृतिक कार्यक्रम सञ्चालन हुनेछन्।
