एमाले बराहक्षेत्रको विस्तारित बैठकमा संगठन सुदृढीकरणदेखि प्रमुख प्रशासकीय अधिकृत विवादसम्म बहस
जनप्रतिनिधिको भूमिकामाथि पार्टीको प्रश्न, वडा कमिटी निष्क्रिय भएको गुनासो; आगामी निर्वाचनमा सक्षम र इमानदार नेतृत्व छनोट गर्नुपर्नेमा जोड
सुनसरी । नेकपा एमाले बराहक्षेत्र नगर कमिटीको पूर्ण विस्तारित बैठक सम्पन्न भएको छ। बैठकमा पार्टीको आन्तरिक एकता, संगठन सुदृढीकरण, जनप्रतिनिधिको भूमिका, वडा कमिटीको निष्क्रियता तथा बराहक्षेत्र नगरपालिकाका प्रमुख प्रशासकीय अधिकृत राधिका गिरीको सरुवा विवादलगायत विषयमा व्यापक छलफल भएको छ।
नगर कमिटी अध्यक्ष सीता पौडेलको अध्यक्षता तथा नेकपा एमाले केन्द्रीय सदस्य एवं सुनसरी जिल्ला इन्चार्ज जगदीश कुशियतको प्रमुख आतिथ्यतामा सम्पन्न बैठकमा सुनसरी निर्वाचन क्षेत्र नं. ४ (क) इन्चार्ज एवं इटहरीका पूर्वप्रमुख द्वारिकलाल चौधरी, प्रदेश कमिटी सदस्य तथा नगर इन्चार्ज योगराज खड्का, जिल्ला तथा नगर कमिटीका सदस्य, वडा कमिटीका पदाधिकारी र पार्टीका नेता–कार्यकर्ताहरूको सहभागिता रहेको थियो।
बैठकमा सबैभन्दा बढी चर्चा बराहक्षेत्र नगरपालिकाका प्रमुख प्रशासकीय अधिकृत राधिका गिरीको सरुवा विवादले पायो। यस विषयमा एमालेबाट निर्वाचित जनप्रतिनिधिहरूबीच फरक धारणा देखिएको र पार्टीसँग आवश्यक परामर्श नगरी केही जनप्रतिनिधि निर्णय प्रक्रियामा सहभागी भएको भन्दै बैठकमा असन्तुष्टि व्यक्त गरिएको थियो।
नगर पार्टी सचिव देवेन्द्र विष्टका अनुसार, पार्टीको निर्णय र संस्थागत परामर्शबिना जनप्रतिनिधिहरूबाट भएको सहमतिप्रति पार्टीले गम्भीर ध्यानाकर्षण गराएको छ। पार्टीले सम्बन्धित जनप्रतिनिधिहरूसँग स्पष्टीकरण माग गरेको र गल्ती स्वीकार गरेका जनप्रतिनिधिहरूले पार्टीसँग आत्मालोचनासहित माफीसमेत मागिसकेको उहाँले बताउनुभयो।
विष्टले प्रमुख प्रशासकीय अधिकृत राधिका गिरीलाई सरुवा नगरी नगरपालिकामै सहज वातावरणमा काम गर्ने अवस्था सिर्जना गर्नुपर्ने पार्टीको धारणा रहेको उल्लेख गर्दै विवादलाई आपसी समझदारीबाट समाधान गर्न आग्रह गरिएको जानकारी दिनुभयो।
बैठकमा वडा तथा नगरस्तरको संगठनात्मक अवस्थामाथि पनि नेता–कार्यकर्ताहरूले खुलेर आलोचनात्मक धारणा राखेका थिए।
नगर सदस्य सुवासकुमार बस्नेतले बराहक्षेत्र–५ को वडा कमिटीमा धेरै नेता तथा पदाधिकारी भए पनि अपेक्षित काम हुन नसकेको टिप्पणी गर्नुभयो। जिम्मेवारी लिएर पदमा बसेका नेताहरूले संगठन विस्तार र पार्टी गतिविधिमा प्रभावकारी भूमिका निर्वाह गर्न नसकेको उहाँको भनाइ थियो।
त्यस्तै, नगर सदस्य टीकाप्रसाद श्रेष्ठले बराहक्षेत्र–७ को वडा कमिटी निष्क्रिय अवस्थामा पुगेको भन्दै अहिलेसम्म प्रभावकारी बैठक तथा भेला हुन नसकेको गुनासो गर्नुभयो। वडा कमिटीका बैठकमा उपस्थिति शून्यजस्तै रहेको र पार्टीका केही नेता–कार्यकर्ता अन्य पार्टीमा प्रवेश गरिसकेको उहाँले बताउनुभयो।
मोहन सुवेदीले प्रमुख प्रशासकीय अधिकृतसम्बन्धी विवादमा पार्टीको गम्भीर ध्यानाकर्षण हुनुपर्ने धारणा राख्दै आगामी स्थानीय निर्वाचनमा आर्थिक लेनदेनबाट मुक्त भएर सक्षम, योग्य र असल नेतृत्वलाई टिकट वितरण गर्नुपर्नेमा जोड दिनुभयो।
भोजपुर जिल्ला कमिटी सदस्य रहिसक्नुभएका टेकेन्द्र कार्कीले बराहक्षेत्रमा बसाइँसराइ गरी आएपछि पनि पार्टी सदस्यता प्राप्त गर्न नसकेको गुनासो गर्दै सदस्यता प्रक्रियालाई सहज बनाउन माग गर्नुभयो।
बैठकमा कृष्ण बरालले पार्टी स्थापनाकालदेखि योगदान गर्दै आएको स्मरण गराउँदै पार्टीभित्र इमानदार कार्यकर्ताको मूल्याङ्कन हुन नसकेको टिप्पणी गर्नुभयो। उहाँले पार्टीमा इमानदारीभन्दा चलखेल र व्यक्तिगत स्वार्थ हाबी हुँदै गएको अनुभूति सुनाउँदै आत्मसमीक्षा नगरे संगठन अघि बढ्न नसक्ने धारणा राख्नुभयो।
त्यस्तै, नगर सदस्य विशाल राईले बैठकमा देखिएको उल्लेख्य उपस्थितिलाई संगठनप्रतिको चासोका रूपमा व्याख्या गर्दै युवाहरूको असन्तुष्टिलाई गम्भीरतापूर्वक लिन नेतृत्वलाई आग्रह गर्नुभयो। उहाँले जेन्जी आन्दोलनका क्रममा पार्टीविरुद्ध नकारात्मक गतिविधिमा संलग्न केही व्यक्तिहरूलाई माथिल्लो कमिटीमा जिम्मेवारी दिइएको भन्दै आपत्ति जनाउनुभयो। युवा पुस्ताको भावना र योगदानको उचित मूल्याङ्कन नभए आगामी निर्वाचनमा बहिष्कारसम्मको अवस्था आउन सक्ने चेतावनीसमेत दिनुभयो।
उहाँले निर्वाचनका क्रममा भएको खर्च पार्टीका व्यवसायी तथा व्यक्तिगत स्रोतबाट जुटाउनुपरेको तर त्यसपछि पार्टी गतिविधिमा सम्बन्धित जनप्रतिनिधिहरूको उपस्थिति र सक्रियता कमजोर देखिएको भन्दै प्रश्न उठाउनुभयो।
बराहक्षेत्र–१ का वडा अध्यक्ष किसान थापा मगरले नगरपालिकामा एमाले अल्पमतमा रहेकाले पार्टीका जनप्रतिनिधिहरूका आवाज र सुझाव सुनुवाइ हुन नसकेको बताउनुभयो। उहाँले प्रमुख प्रशासकीय अधिकृतको विवादमा एमालेका जनप्रतिनिधिहरूको असहमति रहेको स्पष्ट पार्नुभयो।
यसैगरी, बराहक्षेत्र–४ का वडा अध्यक्ष एवं एमाले सुनसरी जिल्ला सचिवालय सदस्य असाराम चौधरीले प्रमुख प्रशासकीय अधिकृत राधिका गिरीको विषयमा आफ्नो धारणा स्पष्ट पार्नुभएको थियो ।
स्वास्थ्य समस्याका कारण प्रारम्भिक बैठकमा उपस्थित हुन नसकेको र त्यसपछि नगर प्रमुख रमेश कार्कीको पटक–पटकको फोन सम्पर्कपछि विपद् व्यवस्थापन समितिको बैठकमा सहभागी भएको उहाँले बताउनुभयो।
संगठन सुधार र आगामी निर्वाचन मुख्य चुनौती
बैठकमा प्रस्तुत भएका धारणा र गुनासाले बराहक्षेत्र एमालेभित्र संगठनात्मक सक्रियता, जिम्मेवारीको जवाफदेहिता, जनप्रतिनिधि र पार्टीबीचको समन्वय तथा नेतृत्व चयन प्रक्रियामा सुधारको आवश्यकता औँल्याएका छन्।
विशेषगरी वडा कमिटीहरूको निष्क्रियता, पार्टी गतिविधिमा जनप्रतिनिधिको कमजोर सहभागिता, पुराना कार्यकर्ताको मूल्याङ्कन र युवा पुस्ताको असन्तुष्टि बैठकका महत्वपूर्ण विषय बने।
आगामी स्थानीय निर्वाचनलाई लक्षित गर्दै आर्थिक प्रभावभन्दा योग्यता, क्षमता, इमानदारी र जनतामाझको लोकप्रियतालाई नेतृत्व छनोटको आधार बनाउनुपर्ने आवाजसमेत बैठकमा उठेको छ।
बैठकलाई नियमित औपचारिकताभन्दा पनि पार्टीभित्रका असन्तुष्टि, कमजोरी र चुनौतीहरू खुलेर राख्ने आत्मसमीक्षाको अवसरका रूपमा लिइएको सहभागीहरूको भनाइ छ। अब बैठकमा उठेका प्रश्न र सुझावलाई नेतृत्वले व्यवहारमा कति कार्यान्वयन गर्छ भन्ने विषयले बराहक्षेत्र एमालेको आगामी संगठनात्मक दिशा र निर्वाचनको तयारी निर्धारण गर्ने देखिन्छ।
