बराहक्षेत्र । बराहक्षेत्र नगरपालिकाका प्रमुख प्रशासकीय अधिकृत राधिका गिरीलाई नगरपालिकामा हाजिर हुन नदिएको तथा हाजिर गराउने उद्देश्यले गरिएको निर्णयप्रति नेकपा एमाले बराहक्षेत्र नगर कमिटीले गम्भीर ध्यानाकर्षण भएको जनाएको छ।
नगर कमिटी अध्यक्ष सीता भण्डारी पौडेलद्वारा जारी प्रेस विज्ञप्तिमा विगत केही दिनदेखि प्रमुख प्रशासकीय अधिकृतलाई नगरपालिकामा हाजिर हुन नदिने तथा हाजिर गराउने उद्देश्यले गरिएको निर्णयप्रति पार्टीको गम्भीर ध्यानाकर्षण भएको उल्लेख गरिएको छ।
विज्ञप्तिमा स्थानीय सरकार सञ्चालन ऐन, प्रचलित कानुन तथा विधिसम्मत प्रक्रियाको पालना गर्नु प्रत्येक जनप्रतिनिधिको संवैधानिक तथा कानुनी दायित्व भएको स्मरण गराइएको छ। कानुनमा स्पष्ट व्यवस्था नभएको विषयमा कार्यपालिकाको बैठकबाट निर्णय गरी प्रशासनिक कामकाजमा अवरोध सिर्जना गर्नु उचित र स्वीकार्य हुन नसक्ने एमालेको ठहर छ।
यसै सन्दर्भमा कार्यपालिकाको बैठकमा उक्त निर्णयमा हस्ताक्षर गर्ने नेकपा एमालेबाट निर्वाचित जनप्रतिनिधिहरूलाई निर्णयमाथि पुनर्विचार गरी तत्काल उक्त निर्णयबाट पछि हट्न एमाले नगर कमिटीले निर्देशन दिएको छ।
त्यस्तै, प्रमुख प्रशासकीय अधिकृतलाई नगरपालिकामा नियमित रूपमा हाजिर भई आफ्नो जिम्मेवारीअनुसार कामकाज गर्ने सहज वातावरण निर्माण गर्नसमेत पार्टीका तर्फबाट आग्रह गरिएको छ।
बराहक्षेत्र नगरपालिकामा प्रमुख प्रशासकीय अधिकृत राधिका गिरीको सरुवासम्बन्धी विवादले प्रशासनिक तथा राजनीतिक वृत्तमा चर्चा पाइरहेका बेला एमाले नगर कमिटीको यो विज्ञप्तिलाई अर्थपूर्ण रूपमा हेरिएको छ।
