‘राधिका गिरीको आरोप : मेयर रमेश कार्कीको नियत नै ठीक देखिएन, काम गर्ने वातावरणसमेत दिइएन’
मेयरको अग्रसरतामा लगाइएको ताला वडा सदस्य गौतम समूहले खोल्यो, प्रमुख प्रशासकीय अधिकृतलाई हाजिर हुन नदिएको आरोप
बराहक्षेत्र । बराहक्षेत्र नगरपालिकामा प्रमुख प्रशासकीय अधिकृत राधिका गिरीको सरुवा तथा हाजिरी विवादले नयाँ मोड लिएको छ। नगरप्रमुख रमेश कार्कीको अग्रसरतामा प्रमुख प्रशासकीय अधिकृतको कार्यालय कक्षमा तालाबन्दी गरिएको र उहाँलाई कार्यालयमा हाजिर हुन नदिने वातावरण बनाइएको आरोप सार्वजनिक भएको छ।
नगरप्रमुख कार्कीको निर्देशनमा प्रमुख प्रशासकीय अधिकृतलाई कार्यालयमा हाजिर हुन नदिने, कार्यालयका चालक तथा कर्मचारीलाई आवश्यक सहयोग नगर्न दबाब दिइएको आरोपसमेत लागेको छ। यसैको विरोध गर्दै बराहक्षेत्र नगरपालिका–५ का वडा सदस्य टेकबहादुर गौतमको नेतृत्वमा रहेको समूहले प्रमुख प्रशासकीय अधिकृतको कार्यालय कक्षमा लगाइएको ताला खोल्न धर्ना दिएको थियो।
वडा सदस्य गौतम समूहले कार्यालय कुनै व्यक्तिको निजी सम्पत्ति नभई जनताको सेवा पाउने सार्वजनिक स्थल भएको भन्दै कार्यालय सञ्चालन र सेवाग्राहीको सहज पहुँच सुनिश्चित हुनुपर्ने धारणा राखेको छ।
आर्डी कृयशन अनलाइन मिडिया सँगको कुराकानीमा ताला खोलेपछि समस्या समाधान भयो कि भएन, सर्वसाधारणले अब सहज रूपमा सेवा पाउँछन् कि पाउँदैनन् र प्रमुख प्रशासकीय अधिकृत कार्यालयमा हाजिर हुनुभयो कि भएन भन्ने प्रश्न गर्दा गौतमले पहिलो चरणको काम सम्पन्न भएको र अब विस्तारै सबै समस्या समाधान हुँदै जाने बताउनुभयो।
तर, प्रमुख प्रशासकीय अधिकृत राधिका गिरी कार्यालयमा हाजिर हुनुभएको विषयमा भने आफू अनविज्ञ रहेको उहाँले बताउनुभयो।
यसैबीच, प्रमुख प्रशासकीय अधिकृत राधिका गिरीले पनि नगरप्रमुख रमेश कार्कीको कार्यशैलीप्रति गम्भीर असन्तुष्टि व्यक्त गर्नुभएको छ।
आर्डी कृयशन अनलाइन सँगको विशेष कुराकानीमा गिरीले कार्यालय खुल्नु मात्र ठूलो कुरा नभई आफूलाई कार्यालयमा उपस्थित भएर काम गर्ने वातावरण दिनु, कर्मचारीबाट सहयोग पाउनु र सेवाग्राहीले सहज रूपमा सेवा प्राप्त गर्नु महत्वपूर्ण रहेको बताउनुभयो।
उहाँले आफ्नो कार्यालय कक्ष तथा आवासीय कोठा मनपरी ढङ्गले बन्द गर्ने र खोल्ने गरिएको, चालक तथा सहयोगीबाट आवश्यक सहयोग नपाएको र कार्यालयमा जाँदा कर्मचारीको असहयोग भोग्नुपरेको आरोप लगाउनुभयो।
विशेषगरी एक महिला कर्मचारीप्रति सम्मानजनक व्यवहार हुनुपर्ने उल्लेख गर्दै उहाँले आफूलाई अपमानित महसुस भएको बताउनुभयो। विवादलाई संवाद र समन्वयबाट समाधान गर्नुपर्ने तथा आफूलाई पनि छलफलमा सहभागी गराएर आफ्ना कुरा राख्ने अवसर दिनुपर्ने उहाँको भनाइ छ।
कार्यपालिकाको निर्णयले विवाद थप चर्कियो
यसअघि २०८३ कात्तिक १० गते मंगलबार बसेको बराहक्षेत्र नगर कार्यपालिकाको ७२औँ बैठकले प्रमुख प्रशासकीय अधिकृत राधिका गिरीलाई कार्यालयमा हाजिर नगराई सम्बन्धित मन्त्रालयमा फिर्ता पठाउने र नयाँ प्रमुख प्रशासकीय अधिकृत खटाउन माग गर्ने निर्णय सर्वसम्मतिले गरेको थियो।
कार्यपालिकाको निर्णय पुस्तिकामा गिरीले पदीय जिम्मेवारी निर्वाह नगरेको, नगरप्रमुखको अनुमति बिना कार्यालयमा अनुपस्थित रहेको तथा महत्वपूर्ण बैठकहरूमा पटक–पटक अनुपस्थित भएको उल्लेख छ। नगरप्रमुख रमेश कार्कीले पनि प्रशासनिक सेवा प्रवाह प्रभावकारी बनाउन र कार्यपालिकाका निर्णय कार्यान्वयन गराउन उक्त निर्णय गरिएको बताउनुभएको छ।
प्रशासकीय अधिकृतले नगरपालिका चलाउन नसकेकाले,जनताको सेवामा कठिनाइ हुन थालेपछि कार्यापालिकाले फिर्ता पठाउने निर्णय गरेको हो; बराहक्षेत्र नगरप्रमुख रमेश कार्की
तर, प्रमुख प्रशासकीय अधिकृत गिरीले आफूलाई काम गर्ने वातावरण नदिइएको आरोप लगाउनुभएको छ। यसले नगरपालिकाभित्र प्रशासनिक नेतृत्व र जनप्रतिनिधिबीचको विवादलाई थप जटिल बनाएको छ।
जनताको कार्यालयमा ताल्चा होइन, सेवा प्रवाह चाहिन्छ
नगरपालिकाको कार्यालय कुनै व्यक्ति वा समूहको निजी कार्यालय नभई आम नागरिकले सेवा प्राप्त गर्ने सार्वजनिक संस्था हो। प्रमुख प्रशासकीय अधिकृतको हाजिरी, कार्यकक्षमा तालाबन्दी, कर्मचारीमाथिको दबाब र जनप्रतिनिधिबीचको विवादले अन्ततः प्रत्यक्ष असर सर्वसाधारण सेवाग्राहीलाई नै पर्ने देखिन्छ।
अब प्रश्न एउटै छ—नगरपालिकाभित्रको शक्ति संघर्ष र प्रशासनिक विवाद कहिलेसम्म चल्ने? जनताले सहज रूपमा सेवा कहिले पाउने?
सम्बन्धित मन्त्रालय, नगरप्रमुख, कार्यपालिका र प्रमुख प्रशासकीय अधिकृतबीच तत्काल संवाद र समन्वय गरी नगरपालिकाको नियमित सेवा प्रवाह सुनिश्चित गर्नु आवश्यक देखिएको छ ।
