बराहक्षेत्र । नेपाल कम्युनिस्ट पार्टी बराहक्षेत्र नगरपालिका–५ नम्बर वडा कमिटीको बैठकले पार्टी सदस्यता नवीकरण तथा संगठन सुदृढीकरण अभियान सञ्चालन गर्ने निर्णय गरेको छ।
२०८३ भाद्र १३ गते शनिबार सम्पन्न बैठकले वडा कमिटीलाई थप सक्रिय, व्यवस्थित र जनमुखी बनाउँदै गाउँ, टोल तथा बस्तीमा पुगेर जनताका समस्या पहिचान गर्ने र आवश्यक सहयोग तथा सहजीकरण गर्ने निर्णय गरेको हो।
वडा कमिटी सचिव कमरेड प्रदीप बासमैतको अध्यक्षता तथा कोशी प्रदेश सदस्य एवं बराहक्षेत्र नगर इन्चार्ज कमरेड योगराज खड्काको प्रमुख आतिथ्यतामा सम्पन्न बैठकले पार्टीका सदस्यहरूले समयमै सदस्यता नवीकरण गर्नुपर्नेमा जोड दिएको छ। वडा कमिटीको अगुवाइमा सदस्यता नवीकरणसँगै पार्टी जागरण तथा संगठन सुदृढीकरण अभियान निरन्तर सञ्चालन गर्ने निर्णयसमेत गरिएको छ।
बैठकले जिल्ला कमिटी सुनसरीको निर्णयअनुसार वडा कमिटी इन्चार्ज कमरेड मिना कार्कीलाई विदाइ गर्दै उहाँले पार्टी संगठनमा पुर्याएको योगदानप्रति धन्यवाद ज्ञापन गरेको छ। नवनियुक्त वडा कमिटी इन्चार्ज कमरेड पुष्पराज ढुंगानालाई स्वागत गर्ने निर्णय पनि बैठकले गरेको छ।
त्यस्तै, २०८३ भाद्र १० गते चीनको तिब्बतबाट आएको भीषण बाढी तथा पहिरोका कारण रसुवा लगायतका क्षेत्रमा भएको जनधनको क्षतिप्रति दुःख व्यक्त गर्दै मृतकहरूप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरिएको छ। घाइतेहरूको शीघ्र स्वास्थ्यलाभको कामना गर्दै प्रभावित क्षेत्रमा उद्धार, राहत तथा पुनःस्थापनालाई प्रभावकारी बनाउन सम्बन्धित निकायलाई आग्रह गर्ने निर्णय गरिएको छ।
बराहक्षेत्रका पाँच जना सम्पर्कविहीन
बैठकले रसुवा क्षेत्रमा बाढीका कारण बराहक्षेत्रका पाँच जना सम्पर्कविहीन भएको जानकारीप्रति गम्भीर ध्यानाकर्षण जनाउँदै तत्काल खोज तथा उद्धारका लागि सरकार, सुरक्षा निकाय तथा सम्बन्धित विपद् व्यवस्थापन निकायसँग अनुरोध गर्ने निर्णय गरेको छ।
सम्पर्कविहीन भनिएका व्यक्तिहरूमा बराहक्षेत्र–११ का छविकेशर काफ्ले, रसुवा भन्सार कार्यालय निर्माणमा कार्यरत मणिकरण राई, बराहक्षेत्र–७ का ट्रक चालक भुवनबहादुर श्रेष्ठ, बराहक्षेत्र–३ की रुबिना कुमारी धामी र बराहक्षेत्र–४ का मोहन माझी रहेका छन्।
निर्वाचनमा भएको पराजयबाट पाठ सिक्नुपर्ने : खड्का
बैठकमा प्रमुख अतिथि योगराज खड्काले पछिल्ला निर्वाचनमा पार्टीले व्यहोरेको पराजयबाट विचलित नभई आत्मसमीक्षा गर्नुपर्ने बताउनुभयो। उहाँले संगठनात्मक कमजोरीको समीक्षा गर्दै नयाँ उत्साहका साथ जनतामाझ पुगेर पार्टी संगठनलाई पुनः सुदृढ बनाउनुपर्ने धारणा राख्नुभयो।
पार्टी कतिपय स्थानमा सुस्ताएको देखिए पनि विगतमा कठिन परिस्थितिबाट उठेर निर्वाचनमा होमिएको उल्लेख गर्दै खड्काले जनताको सुख–दुःखमा साथ दिँदै संगठनलाई बलियो बनाउन कार्यकर्तालाई आग्रह गर्नुभयो।
वडा कमिटी सचिव तथा बैठकका सभाध्यक्ष प्रदीप बासमैतले राजनीतिक पार्टी देश सञ्चालनको महत्वपूर्ण संस्था भएकाले पार्टीको नीति, निर्णय र योजनाअनुसार संगठनलाई सक्रिय बनाउनुपर्ने बताउनुभयो। उहाँले व्यक्तिगत स्वार्थभन्दा माथि उठेर पार्टी र जनताको हितलाई केन्द्रमा राख्न कार्यकर्तालाई आग्रह गर्नुभयो।
जिम्मेवारी वा अपेक्षित पद नपाएका कारण असन्तुष्टि र प्रतिशोधको भावना राख्न नहुने भन्दै बासमैतले सबै कार्यकर्ता संयमित, अनुशासित र एकताबद्ध भएर संगठनको हितमा काम गर्नुपर्नेमा जोड दिनुभयो।
बराहक्षेत्र नगर कमिटी सचिव देवेन्द्र विष्टले विगतका कमजोरी तथा आरोप–प्रत्यारोपमा अल्झिनुभन्दा आगामी दिनमा पार्टीलाई कसरी प्रभावकारी बनाउने भन्ने विषयमा ध्यान केन्द्रित गर्नुपर्ने बताउनुभयो। उहाँले संगठन निर्माण र जनसम्बन्ध विस्तारमा सबै तहका नेता तथा कार्यकर्ताको सक्रिय भूमिका आवश्यक रहेको धारणा राख्नुभयो।
स्थानीय निर्वाचनलाई लक्षित गर्दै संगठन परिचालन गरिने
बैठकले आगामी स्थानीय निर्वाचनलाई लक्षित गर्दै पार्टी संगठनलाई अहिलेदेखि नै परिचालन गर्ने विषयमा समेत छलफल गरेको छ। सम्भावित उम्मेदवारहरूको समयमै पहिचान गरी जनतामाझ स्थापित गराउने तथा जनताको सुख–दुःखमा निरन्तर सहभागी हुँदै सामाजिक रूपमा स्वीकार्य नेतृत्व निर्माण गर्नुपर्नेमा जोड दिइएको छ।
बैठकले राजनीतिक परिवर्तनसँगै सडक, पुल, शिक्षा लगायतका क्षेत्रमा भएका विकास तथा उपलब्धिलाई जनतामाझ पुर्याउनुपर्ने निष्कर्ष निकालेको छ। विगतका राजनीतिक संघर्ष तथा भूकम्प, कोभिड–१९, बाढी–पहिरोलगायतका विपद्का कारण विकास प्रक्रियामा चुनौती देखिए पनि प्राप्त उपलब्धिको संरक्षण गर्दै बाँकी आवश्यकता र कमजोरी पहिचान गरी क्रमिक रूपमा विकास र समृद्धिको दिशामा अघि बढ्नुपर्ने बैठकले निष्कर्ष निकालेको छ।
बैठकले पार्टी संगठनलाई थप एकताबद्ध, अनुशासित, सक्रिय तथा जनमुखी बनाउँदै जनताको सुख–दुःखमा निरन्तर साथ दिने प्रतिबद्धतासहित सम्पन्न भएको जनाएको छ।
