शान्ति पत्रकारिता, सामाजिक विकास र शिक्षा प्रवर्द्धनमा योगदानको कदर गर्दै मगाममा विशेष सम्मान
मगाम (जम्मु–कश्मीर), वरिष्ठ सार्क पत्रकार सैयद मुश्ताकलाई अन्तर्राष्ट्रिय स्तरमा हासिल गरेका उपलब्धि, शान्ति पत्रकारिता तथा सामाजिक विकासमा पुर्याएको योगदानको सम्मानस्वरूप मगामस्थित सर सैयद पुस्तकालयमा विशेष समारोहबीच सम्मान गरिएको छ।
मिडिया फ्रेटरनिटी सेन्ट्रल कश्मीर तथा जम्मु–कश्मीर प्राइभेट स्कुल्स फोरम (JKPSF) का विद्वान् र शिक्षाविद्हरूद्वारा आयोजित कार्यक्रममा पत्रकार, शिक्षाविद्, सामाजिक अभियन्ता, अनुसन्धानकर्ता तथा स्थानीय समुदायका प्रतिनिधिहरूको उल्लेख्य सहभागिता रहेको थियो।
कार्यक्रममा वक्ताहरूले सैयद मुश्ताकले पत्रकारितामार्फत शान्ति स्थापना, सामाजिक सद्भाव, शिक्षा प्रवर्द्धन तथा समुदायको हितमा निरन्तर योगदान पुर्याएको उल्लेख गर्दै उनको कार्यको प्रशंसा गरेका थिए। उनीहरूले अन्तर्राष्ट्रिय मञ्चमा प्राप्त सफलताले जम्मु–कश्मीरको पत्रकारिता क्षेत्रलाई नयाँ पहिचान दिलाएको बताए।
सम्मान ग्रहण गर्दै सैयद मुश्ताकले आफूले प्राप्त गरेका दुई अन्तर्राष्ट्रिय पुरस्कार व्यक्तिगत नभई देश, समाज र सम्पूर्ण जम्मु–कश्मीरका नागरिकहरूको साझा उपलब्धि भएको प्रतिक्रिया दिए।
“यो सम्मान मेरो व्यक्तिगत सम्मान होइन, सम्पूर्ण जम्मु–कश्मीरका नागरिकहरूको सम्मान हो। यहाँसम्म पुग्न मेरो परिवार, साथीभाइ र आम जनताको ठूलो साथ र सहयोग रहेको छ,” उनले भने।
उनले आगामी दिनमा पनि शान्ति, जिम्मेवार पत्रकारिता, सामाजिक कल्याण तथा जनहितका विषयमा निरन्तर सक्रिय रहने प्रतिबद्धता व्यक्त गरे। साथै पत्रकारिताको नाममा धम्की, त्रास र सामाजिक विभाजन फैलाउने प्रवृत्तिप्रति चिन्ता व्यक्त गर्दै यस्ता गतिविधिलाई निरुत्साहित गर्नुपर्ने धारणा राखे।
“समाज परिवर्तनका लागि इमानदार र उत्तरदायी पत्रकारिताको भूमिका महत्वपूर्ण हुन्छ। पत्रकारिताको मर्यादा विपरीत कार्य गर्ने प्रवृत्तिलाई नियन्त्रण गरी सत्य, निष्पक्ष र जनउत्तरदायी सञ्चारकर्मीलाई प्रोत्साहन गर्न सके समाज र देश दुवै समृद्धिको दिशामा अघि बढ्न सक्छ,” उनले बताए।
कार्यक्रममा सहभागीहरूले सैयद मुश्ताकले अन्तर्राष्ट्रिय स्तरमा हासिल गरेको पहिचान जम्मु–कश्मीरका पत्रकार, युवा अनुसन्धानकर्ता तथा विद्यार्थीहरूका लागि प्रेरणाको स्रोत बनेको उल्लेख गर्दै उनको सफलताको प्रशंसा गरेका थिए।
