इनरुवा । नेपाली कांग्रेसको १५औँ महाधिवेशन नजिकिँदै गर्दा इनरुवाका युवा नेता रोहित थारुले सामाजिक सञ्जालमार्फत इनरुवा नगर कार्यसमितिको सचिव पदमा आफ्नो उम्मेदवारी औपचारिक रूपमा घोषणा गरेका छन्। नेपाली कांग्रेसले १५औँ महाधिवेशनको निर्वाचन कार्यतालिका सार्वजनिक गरिसकेको छ।
थारुले मिडियासँग कुरा गर्दै “यस पटक हरहालतमा मेरो उम्मेदवारीको दाबी रहनेछ” भन्दै आफू सचिव पदको तयारीमा दृढतापूर्वक अघि बढेको बताए। विगतमा पटक–पटक आश्वासन दिएर ‘ललिपप देखाउँदै फकाउने र फुस्लाउने’ प्रयास भए पनि यसपटक आफू आफ्नो दाबीबाट पछि नहट्ने उनको भनाइ छ।
नगर सचिव पदमा उम्मेदवारी घोषणा गर्दै थारुले पार्टी संगठनलाई थप गतिशील बनाउने, युवालाई कांग्रेसको मूलधारमा जोड्ने तथा स्थानीय तहमा पार्टी संगठनलाई अझ मजबुत बनाउने आफ्नो प्राथमिकता रहेको बताए।
“युवाको आवाजलाई पार्टीभित्र बलियो रूपमा स्थापित गर्दै संगठनलाई चलायमान बनाउने मेरो मुख्य उद्देश्य हो,” थारुले भने, “यसपटक आश्वासन होइन, जिम्मेवारी र नेतृत्वका लागि मेरो स्पष्ट दाबी हो।”
हाल नेपाली कांग्रेस इनरुवा–५ वडा कार्यसमिति बलाहाका सचिव, सुनसरी जिल्ला कार्यसमिति सूचना, सञ्चार तथा प्रचारप्रसार समिति सदस्य तथा थारु कल्याणकारिणी सभा इनरुवा नगर कमिटीका सभापतिको जिम्मेवारीमा रहेका थारु लामो समयदेखि सामाजिक तथा राजनीतिक गतिविधिमा सक्रिय छन्।
उनको उम्मेदवारी घोषणासँगै इनरुवा कांग्रेसको नगर नेतृत्वमा युवा पुस्ताको दाबी र संगठनभित्रको नयाँ नेतृत्वको बहस थप रोचक बनेको छ।
