कुवेत, १८ सेप्टेम्बर २०२६ — नेपाली राजदूतावास कुवेतले मेट्रो मेडिकल ग्रुपसँगको सहकार्यमा आज खैतानस्थित Metro Medical Care परिसरमा कुवेतमा बसोबास गर्ने नेपालीहरूका लागि निःशुल्क स्वास्थ्य शिविर सञ्चालन गरेको छ। शिविरमा ब्लड सुगर, कोलेस्ट्रोल र रक्तचापको निःशुल्क परीक्षणसँगै चिकित्सकसँग निःशुल्क परामर्शको समेत व्यवस्था गरिएको थियो।
कार्यक्रमको प्रारम्भमा कुवेतका लागि नेपाली राजदूत महामहिम घनश्याम लम्सालले शिविरको उद्देश्य र महत्त्वबारे प्रकाश पार्दै दूतावासको आह्वानलाई स्वीकार गरी उत्साहपूर्वक सहभागिता जनाउनुहुने सबै सहभागीहरूप्रति हार्दिक आभार व्यक्त गर्नुभयो। उहाँले स्वस्थ जीवनशैली अवलम्बन गर्दै आफ्नो स्वास्थ्यप्रति सचेत र संवेदनशील रहन उपस्थित सबैलाई आग्रह गर्नुभयो। साथै, कुवेतका विभिन्न स्थानमा छरिएर रहेका नेपाली नागरिकहरूलाई समेट्ने गरी आगामी दिनमा यस्ता स्वास्थ्यसम्बन्धी कार्यक्रमहरू अन्य स्थानहरूमा समेत सञ्चालन गर्दै लगिने जानकारी दिनुभयो।
राजदूत लम्सालले कार्यक्रम सफलतापूर्वक सम्पन्न गर्न चिकित्सा तथा स्वास्थ्य सेवा निःशुल्क उपलब्ध गराउने स्थानीय मेट्रो मेडिकल ग्रुप तथा मेट्रो मेडिकल केयर खैतानका चिकित्सक र स्वास्थ्यकर्मीहरू, र स्वास्थ्य शिविरको व्यवस्थापनमा महत्त्वपूर्ण सहयोग गर्ने गैर-आवासीय नेपाली संघ कुवेत, रोयल गाउँले रेस्टुरेन्ट लगायत विशेष योगदान पुर्याउने सबै संस्था र व्यक्तिहरूलाई धन्यवाद ज्ञापन गर्नुभयो।
दूतावासका अनुसार कुवेतमा बसोबास गर्ने करिब १५० नेपालीले सेवा लिएको उक्त स्वास्थ्य शिविरका लागि अग्रिम रूपमा अनलाइन मार्फत रजिस्ट्रेशन गरी नाम दर्ता गराउने व्यवस्था मिलाइएको थियो। कार्यक्रममा अस्पतालका उच्च पदस्थ कर्मचारीहरू र दूतावासका कर्मचारीहरूको समेत उपस्थिति रहेको थियो, र कार्यक्रम सहज तथा व्यवस्थित रूपमा सम्पन्न भयो।
