२०७६ सालदेखि संस्थापक अध्यक्ष राजन कार्कीको पहलमा निरन्तर हुँदै आएको रक्तदान, यसपटक १०० जनाको लक्ष्य
बराहक्षेत्र । संविधान दिवस–२०८३ को अवसरमा लायन्स क्लब अफ बराहक्षेत्र कालाबन्जारले आयोजना गरेको ८औँ रक्तदान तथा सुगर–प्रेसर परीक्षण कार्यक्रम सम्पन्न भएको छ। कार्यक्रममा ६ जना महिला र ६४ जना पुरुष गरी ७० जनाले रक्तदान गरेका छन् भने ८५ जनाले निःशुल्क सुगर परीक्षण सेवा लिएका छन्।
लायन्स क्लब अफ ३२५ डिस्ट्रीक्ट ‘सी’का डिस्ट्रिक्ट चिफ सुनिल साहका अनुसार क्लबले संस्थापक अध्यक्ष तथा तत्कालीन चटार प्रेसिडेन्ट राजन कार्कीको पहलमा २०७६ सालदेखि रक्तदान कार्यक्रम सुरु गरी निरन्तर आयोजना गर्दै आएको हो।
साहका अनुसार यसपटक १०० जना रक्तदाता पुर्याउने लक्ष्य राखिएको थियो। तर केही प्राविधिक कारण तथा बराहक्षेत्र नगरपालिकाले समेत रक्तदान कार्यक्रम आयोजना गरेका कारण लक्ष्यअनुसार रक्तदाता सहभागी हुन नसकेको उनले बताए।
“२०७६ सालदेखि निरन्तर रक्तदान कार्यक्रम गर्दै आएका छौँ। यसपटक १०० जनाको लक्ष्य थियो, तर विभिन्न कारणले लक्ष्य पूरा हुन सकेन,” साहले भने।
क्लबका अध्यक्ष विनोद चौधरीले पछिल्लो समय देशका विभिन्न क्षेत्रमा आएको बाढी, पहिरो तथा प्राकृतिक विपत्तिका कारण घाइते तथा बिरामीको उपचारमा रगतको आवश्यकता बढ्दै गएको भन्दै रक्तदान कार्यक्रम आयोजना गरिएको बताए।
अध्यक्ष चौधरीले रक्तदान जीवनदान भएको उल्लेख गर्दै कार्यक्रममा सहभागी सम्पूर्ण रक्तदाताप्रति आभार व्यक्त गरे। “एक व्यक्तिले गरेको रक्तदानले अर्को व्यक्तिको अमूल्य जीवन बचाउन सक्छ,” उनले भने।
कार्यक्रममा क्लबका प्रथम उपाध्यक्ष प्रदीप बासमैतले कार्यक्रम सफल बनाउन सहयोग गर्ने विभिन्न संघ–संस्था, व्यवसायी, व्यक्ति तथा सहयोगी दाताप्रति धन्यवाद व्यक्त गरे। प्रत्यक्ष तथा अप्रत्यक्ष रूपमा सहयोग गर्ने सबैको साथ र सहकार्यका कारण कार्यक्रम सफल भएको उनले बताए।
रक्तदातालाई अस्पतालको सहुलियत कार्ड
कार्यक्रममा विराटनगर टिचिङ मेडिकल हस्पिटल प्रा.लि.का प्राविधिक प्रमुख प्रवीण दाहालले रक्तदातालाई अस्पतालबाट उपलब्ध हुने सहुलियत सेवाबारे जानकारी गराए।
अस्पतालले रक्तदातालाई सहुलियत कार्ड उपलब्ध गराउने र उक्त कार्ड देखाएर उपचार सेवा लिँदा विभिन्न सेवामा छुट प्राप्त हुने जनाएको छ।
८५ जनाको निःशुल्क सुगर परीक्षण
कार्यक्रममा बराह रामधुनी पोलिक्लिनिक प्रा.लि., बराहक्षेत्र–५, कालाबन्जारले निःशुल्क सुगर परीक्षण सेवा प्रदान गरेको थियो।
पोलिक्लिनिककी प्राविधिक कल्पना चौधरीका अनुसार कार्यक्रममा ८५ जनाले निःशुल्क सुगर परीक्षण सेवा लिएका छन्।
रक्तदाताको गुनासो : ‘रक्तदान गरेपछि आवश्यक पर्दा सेवा पाउन सहज हुनुपर्छ’
कार्यक्रमका क्रममा केही रक्तदाताले आफूहरूले वर्षौंदेखि रक्तदान गर्दै आए पनि आफू वा परिवारका सदस्य बिरामी पर्दा आवश्यक रगत तथा रक्तदानसँग सम्बन्धित सहुलियत सेवा प्राप्त गर्न कठिनाइ हुने गरेको गुनासो गरेका छन्।
बराहक्षेत्र–५ का एक रक्तदाताले आफूले लामो समयदेखि रक्तदान गर्दै आए पनि रक्तदातालाई उपलब्ध गराउने भनिएको कार्ड तथा त्यसबाट प्राप्त हुने सेवाबारे स्पष्ट जानकारी नपाएको गुनासो गरे।
उनले रक्तदाताले आफू वा परिवारका सदस्यलाई रगत आवश्यक पर्दा सहज रूपमा सेवा पाउने व्यवस्था हुनुपर्ने बताए। कार्यक्रममा उनले आयोजक पक्षसँग रक्तदाताको विवरण, कार्ड तथा अस्पतालबाट प्राप्त हुने सहुलियत सेवाका विषयमा स्पष्ट जानकारी मागेका थिए।
ती रक्तदाताले रगतको व्यवस्थापन र वितरण प्रक्रियामा पारदर्शिता हुनुपर्ने भन्दै आयोजकसँग प्रश्नसमेत उठाएका थिए। उनले रक्तदान गर्ने व्यक्तिलाई भविष्यमा रगत आवश्यक पर्दा सहज रूपमा सेवा उपलब्ध हुने सुनिश्चितता गर्नुपर्ने माग गरे।
त्यस्तै, रामधुनी नगरपालिका–६ का अर्का रक्तदाताले पनि आफू गर्मीमा टाढाबाट रक्तदान गर्न आएको उल्लेख गर्दै रक्तदान गरेपछि रक्तदाताले पाउने सेवा तथा सुविधाबारे स्पष्ट व्यवस्था हुनुपर्ने बताए।
उनले आयोजकसँग आफूले भोगेको समस्या सार्वजनिक रूपमा राख्दै आगामी दिनमा रक्तदान कार्यक्रम आयोजना गर्दा रक्तदाताको सेवा र सुविधालाई समेत प्राथमिकतामा राख्न आग्रह गरे।
आयोजकसँग स्पष्टीकरण माग, दाताको विवरण उपलब्ध गराउने प्रतिबद्धता
रक्तदाताले उठाएको गुनासोपछि कार्यक्रमस्थलमा केही समय आयोजक तथा प्राविधिक टोलीबीच छलफल भएको थियो।
प्रथम उपाध्यक्ष प्रदीप बासमैतले रक्तदाताले उठाएको समस्या प्राविधिक टोलीसमक्ष राख्दै त्यसबारे स्पष्ट जानकारी दिन आग्रह गरेका थिए।
त्यसपछि विराटनगर टिचिङ मेडिकल हस्पिटलका प्राविधिक प्रमुख प्रवीण दाहालले रक्तदान कार्यक्रममा सहभागी सबै दाताको विवरण संकलन गरी २–३ दिनभित्र आयोजकलाई उपलब्ध गराउने बताएका थिए।
दाहालका अनुसार दाताको विवरणका आधारमा रक्तदाताले पाउने सेवा तथा सहुलियतबारे थप स्पष्टता ल्याउन सकिनेछ।
विभिन्न संघ–संस्था तथा व्यवसायीको सहयोग
कार्यक्रम सफल बनाउन बराह गार्मेन्ट एन्ड प्रिन्ट, चतरा कृषि सहकारी संस्था लिमिटेड, चन्द्रमा सामुदायिक बचत तथा ऋण सहकारी संस्था लिमिटेड, जी.एस. लक्ष्मी कन्स्ट्रक्सन एन्ड सप्लायर्स प्रा.लि. (लक्ष्मी कंक्रिट उद्योग), मुनबिम एकेडेमी, डाफे मुनाल कन्स्ट्रक्सन प्रा.लि., जुलिसा हार्डवेयर, उत्तम ज्वेलर्स तथा अमाह जलकन्या कन्स्ट्रक्सन प्रा.लि. लगायतले सहयोग गरेका थिए।
लायन्स क्लब अफ बराहक्षेत्र कालाबन्जारले सामाजिक उत्तरदायित्वअन्तर्गत रक्तदान तथा स्वास्थ्य परीक्षणलगायतका मानवीय सेवामूलक कार्यक्रमलाई आगामी दिनमा समेत निरन्तरता दिने जनाएको छ।
तर रक्तदान अभियानलाई अझ प्रभावकारी बनाउन रक्तदाताको विवरण, रक्तदानपछि उपलब्ध हुने सहुलियत, आवश्यक पर्दा रगत प्राप्त गर्ने प्रक्रिया तथा अस्पतालसँगको सहकार्यबारे स्पष्ट र पारदर्शी जानकारी दिनुपर्ने आवाज कार्यक्रममै उठेको छ।
