विद्यालय पूर्वाधार लगानी कार्यक्रम अन्तर्गत वराहक्षेत्रको जडेज माविको नाम

शिक्षा तथा खेलकुद मन्त्रालयले दुई हजारभन्दा बढी विद्यार्थी अध्ययनरत देशभरका १०९ वटा सामुदायिक विद्यालयलाई प्राथमिकतामा राखेर भौतिक पूर्वाधार विस्तारको महत्वाकांक्षी योजना कार्यान्वयनमा ल्याएको छ ।
यो कार्यक्रममा सुनसरीको दुई विद्यालय धरान उपमहानगरपालिकास्थित श्री पब्लिक हाइस्कुल र वराहक्षेत्र नगरपालिकाको जगन्नाथ डेडराज जनता (जडेज) माविसमेत छानिएका छन् । 
दुई हजार भन्दा धेरै विद्यार्थी भएका १०९ वटा विद्यालयको भौतिक संरचना सुदृढीकरणका लागि कुल ६ अर्ब ५४ करोड रुपैयाँ बजेट विनियोजन गरिएको हो । यसमध्ये पहिलो चरणमा ८९ वटा विद्यालयको पहिचान गरी ५ अर्ब ३४ करोड रुपैयाँ निकासा भएको छ । 
प्रतिविद्यालय करिब ६ करोड रुपैयाँको लागतमा आधुनिक १२ कोठे तीन तले भवन, अत्याधुनिक प्रयोगशाला र समृद्ध पुस्तकालय निर्माण गर्ने गरी काम तीव्र पारिएको शिक्षा तथा खेलकुद मन्त्री सस्मित पोखरेलले बताएका छन्।
‘पहिलो चरणमा ८९ वटा विद्यालयका लागि ५ अर्ब ३४ करोड रुपैयाँ निकासा गरी अत्याधुनिक १२ कोठे तीन तले भवन निर्माणको काम तीव्र गतिमा अघि बढाइरहेका छौँ। प्रतिविद्यालय करिब ६ करोड रुपैयाँको लागतमा बन्ने यी भवनहरूमा आधुनिक कक्षाकोठा, व्यवस्थित प्रयोगशाला र समृद्ध पुस्तकालयको समेत व्यवस्था हुने कुरा बताएका छन्।
वराहक्षेत्रको वडा नं ५ मा रहेको जडेज मा वि सुनसरीकै एक उत्कृष्ट सामुदायिक विद्यालयका रुपमा चिनिन्छ।जहाँ  उच्च शिक्षा अन्तर्गत विज्ञान,व्यवस्थापन र शिक्षा सङ्कायमा समेत अध्यापन गराइन्छ।